စမ်းချောင်းမြို့နယ်တွင်နေအိမ်တိုက်တစ်လုံး မီးကြီးမားစွာလောင်ကျွမ်းမှုဖြစ်ပွား

အခုနောက်ပိုင်း ရာသီဥတု ပူပြင်းလာတာကြောင့်ရယ် လျှပ်စစ်မီး အန္တရာယ်တွေကြောင့်ရယ် မီးလောင်ကျွမ်းမှုများ ခပ်စိတ်စိတ် ဖြစ်လာပါတယ်။ ဒီကနေ့ ၂၃ ရက်နေ့ နံနက် ၃ နာရီ ၂၁ မိနစ် ခန့်အချိန်ကလည်း ရန်ကုန်တိုင်းဒေသကြီး ၊ စမ်းချောင်းမြို့နယ် ၊ မုန့်လုပ်ဆောင်းတောင်ရက်ကွက် ဟံသာဝတီ အဝိုင်းအနီးမှာ နေအိမ်တစ်လုံး မီးလောင်ကျွမ်းမှု ဖြစ်ပွားခဲ့ပါတယ်။

မီးလောင်ကျွမ်းမှုကို အနောက်ပိုင်းခရိုင်မီးသတ်စခန်းမှ မီးသတ်ယာဉ် (၁)စီး၊ စမ်းချောင်းမြို့နယ်မီးသတ်စခန်းမှ မီးသတ်ယာဉ် (၃)စီးနဲ့ ရပ်ကွက် နေပြည်သူများ ဝိုင်းဝန်းငြိမ်းသတ်ခဲ့ကြပါတယ်။ နံနက် ၃ နာရီ ၄၈ မိနစ်အချိန်မှာ မီးငြိမ်းသွားခဲ့ပြီး စုစုပေါင်း အချိန် နာရီဝက်နီးပါး ငြိမ်းသက်ခဲ့ရတယ်လို့ သိရပါတယ်။

မီးလောင်မှုကို တတ်နိုင်သမျှ ကြိုးစားငြိမ်းသတ်ခဲ့ပေမယ့်လည်း အိမ်ရဲ့ အပေါ်ပိုင်း တစ်ပိုင်းလုံး နီးပါး မီးထဲပါသွားခဲ့တာကြောင့် ပျက်စီးဆုံးရှုံးမှု တော်တော်လေးများနိုင်တယ်လို့ သုံးသပ်ထားကြပါတယ်။

မီးလောင်ရတဲ့ အကြောင်းအရင်းကိုတော့ သေချာမသိရသေးပေမယ့် လျှပ်စစ်မီးကြောင့် လောင်ကျွမ်းရခြင်း ဖြစ်နိုင်တယ်လို့ သိရပါတယ်။