ဖားကန့်မှာမြေစာပုံပြိုကျလို့ လူ၁၀၀ ကျော် ပျောက်ဆုံးနေ

ဒီကနေ့ ဒီဇင်ဘာလ ၂၂ ရက်နေ့က ဖားကန့်မှာ မြေစာပုံပြိုကျမှု ထပ်မံဖြစ်ပွားခဲ့တာကြောင့် လူပေါင်း ၁၀၀ ကျော်လောက် ပျောက်ဆုံးမှုဖြစ်ပွားခဲ့တယ်လို့ သိရပါတယ်။ မြေစာပုံပြိုကျလို့ ပျောက်ဆုံးနေတဲ့စာရင်းဟာ လက်ရှိအချိန်အထိ ကနဦးသိရှိချက်အရ အယောက် ၁၀၀ လောက်ရှိသွားပြီလို့ သိရပါတယ်။

မြေစာပုံပြိုကျမှုဟာ ဖားကန့်မြို့ ၊ မှော်စီစာကျေးရွာ အနီးမှာရှိတဲ့ သာယာကျေးရွာက ကုမ္ပဏီလုပ်ကွက်တစ်ခုမှာဖြစ်ပါတယ်။ ဒေသခံတွေအနေနဲ့ ကျောက်စိမ်းတူးဖော်သည့်အလုပ်က အသက်မွေးဝမ်းကျောင်းအလုပ်တစ်ခုဖြစ်တာကြောင့် အခုလို လူအများအပြား မြေစာပုံပြိုကျတဲ့အထဲ ပါသွားခဲ့ရတာပါ။

ပြီးခဲ့တဲ့ ဒီဇင်ဘာလ ၁၉ ရက်နေ့တုန်းကလည်း မြေစာပုံပြိုကျမှုကြောင့် လူ ၁၀ ယောက်ကျော်လောက် ပျောက်ဆုံးမှုတွေရှိခဲ့ပါတယ်။ ဒီကနေ့မနက်ပိုင်းမှာတော့ အယောက် ၁၀၀ ကျော်လောက်ထိ ပျောက်ဆုံးနေတယ်လို့ သိရပါတယ်။ ပျောက်ဆုံးနေတဲ့သူတွေထဲမှာ ရေမဆေးကျောက်ရှာဖွေသူတွေ ၊ ဈေးရောင်းချသူတွေ ပါဝင်ကြောင်း သိရပါတယ်။ ပျောက်ဆုံးနေတဲ့သူတွေကို ရှာဖွေဖို့ ကယ်ဆယ်ရေးအဖွဲ့အစည်းတွေ ရောက်နေပြီလို့ သိရပါတယ်။ ပျောက်ဆုံးနေတဲ့သူတွေကို အသက်ရှင်လျက်ပြန်လည်ရှာတွေ့ဖို့ မျှော်လင့်ပါတယ်။