လှိုင်သာယာ ကျူးကျော်နေအိမ်များ စတင်ဖျက်ဆီးနေသည့် ပုံရိပ်များ

လှိုင်သာယာမြို့နယ်ရှိ ကျူးကျော်နေအိမ်များကို ဒီကနေ့အောက်တိုဘာလ ၂၈ ရက်နေ့တွင်စတင်ရှင်းလင်းနေပြီလို့ သိရပါတယ်။ လှိုင်သာယာမြို့နယ်တွင်းမှာ စီမံကိန်းတွေ စတင်ဆောင်ရွက်တော့မယ်လို့ ကြေညာပြီး မကြာမီမှာပဲ အခုလို မျိုးကျူးကျော်တွေကို စတင်ဖယ်ရှားနေတာလို့ သိရပါတယ်။

ယနေ့ မနက်ပိုင်းမှာတော့ လှိုင်သာယာမြို့နယ် ဘုရင့်နောင်တံတားဘေးမှာရှိတဲ့ ရန်ကုန်-ပုသိမ်လမ်းမကြီးဘေး ဘယ်ညာ မှာရှိတဲ့ ကျူးကျော် နေအိမ်တွေကို စတင်ဖျက်ဆီးနေပြီဖြစ်ပါတယ်။ ကျူးကျော်နေအိမ်တွေကို ဖြိုဖျက်ရာမှာ ဘူဒိုဇာကားများ ၊ အထိကရုဏ်းနှိမ်နှင်းရေးကားများ ၊ အချုပ်ကားများ ၊ စစ်ကားများနှင့်ရဲကားများ ၊ စည်ပင်ကားများ အလုံးအရင်းနှင့်ပါဝင်ကာ ဖြိုဖျက်နေကြတာ ဖြစ်တယ်လို့ သိရပါတယ်။ ဖြတ်သန်းသွားလာနေသော ဆိုင်ကယ်များ တွေ့ပါကလည်း ချက်ချင်း ဖမ်းဆီးစစ်ဆေးနေကြောင်း သိရပါတယ်။

ကျူးကျော်နေအိမ်တွေကို ဖယ်ရှားရာမှာ ဘုရင့်နောင်တံတားကို ပိတ်ပြီး အင်အားအလုံးအရင်းနှင့် ဖယ်ရှားနေတာဖြစ်ပါတယ်။ အခုလို ဖြိုဖျက်မှုကြောင့် ကျူးကျော်နေအိမ်များတွင် နေထိုင်နေကြတဲ့ ပြည်သူများ အခက်အခဲဖြစ်နေကြတယ်လို့လည်း သိရှိရပါတယ်။