အမေရိကန်ရောက် မြန်မာလူမျိုးများကို ကူညီပေးနေသည့် မြန်မာအမျိုးသမီးတစ်ဦး သေနတ်ပစ်ခံရ

ပြီးခဲ့တဲ့ ဇူလိုင်လ ၁၅ ရက်နေ့ ၊ သောကြာနေည သန်းခေါင်ယံအချိန်မှာ ဒန်ဗာအရှေ့ပိုင်း ၊ ဆီးနီးယားလမ်းမပေါ်က ပစ်ခတ်မှုကြောင့် အပြစ်မဲ့ မြန်မာ အမျိုးသမီးတစ်ဦး ဖြစ်သူ မခိုင်ဆိုသူ အသက်ဆုံးပါးသွားခဲ့ရတယ်လို သိရပါတယ်။

မခိုင်ဟာ အမေရိကန်နိုင်ငံရောက် မြန်မာလူမျိုးများကို ကူညီပေးနေတဲ့သူဖြစ်ပြီး ထိုင်းနိုင်ငံ ဒုက္ခသည် စခန်းကနေ အမေရိကားကို ရောက်ရှိခဲ့တာ ဖြစ်ပါတယ်။ သား ၄ ယောက်နဲ့အတူနေထိုင်တဲ့ မခိုင်ဟာ မကြာသေးမီကလည်း တော်ဝင် စားသောက်ဆိုင်ကို ဖွင့်လှစ်ထားခဲ့တာ ဖြစ်ပါတယ်။ ကူညီတတ်ပြီး စိတ်ကောင်းရှိတဲ့ သူဖြစ်တာကြောင့် လူချစ်လူခင် ပေါများတဲ့ မခိုင်တစ်ယောက် ဘာကြောင့် အခုလို ဖြစ်ခဲ့တာလဲဆိုတာကတော့ မေးခွန်းထုတ်စရာပဲ ဖြစ်ပါတယ်။

သောကြာနေ့ညတုန်းက အမေရိကားမှာ သေနတ်နဲ့ အပစ်ခံရမှု စုစုပေါင်း ၄ ကြိမ် ဖြစ်ပွားခဲ့တယ်လို့ သိရပြီး သေဆုံးခဲ့တဲ့သူက မခိုင်တစ်ယောက်ပဲဖြစ်ပါတယ်။ သေနတ်နဲ့အပစ်ခံခဲ့ရတုန်းက မခိုင်ဟာအသက် ၂၀ အရွယ်ဖြစ်သူ သားဖြစ်သူက လက်ထဲမှာ အရေးပေါ်ကားကို စောင့်နေရင်း အသက်မမီဘဲ ကွယ်လွန်သွားခဲ့တာဖြစ်ပါတယ်။ ပစ်ခဲ့မှု ဖြစ်ပွားတုန်းက ၉၁၁ အရေးပေါ်ကားကို ၅ ကြိမ်ခေါ်ဆိုခဲ့ပေမယ့်လည်း ဖုန်းချပစ်ခြင်း ခံခဲ့ရတယ်လို့ သတင်းဌာနများက ဖော်ပြထားပါတယ်။

အမေရိကန်ရောက် မြန်မာလူမျိုးတွေရဲ့ အခက်အခဲတွေကို ထောက်တိုင်တစ်ခုလိုမျိုး ကူညီပေးတတ်တဲ့ မခိုင်တစ်ယောက် ကောင်းရာသုဂတိလားပါစေလို့ ဆုတောင်းပေးရင်း မခိုင် ကွယ်လွန်သွားတဲ့ သတင်းကို စိတ်မကောင်းဖွယ်ရာလေး ဖော်ပြပေးလိုက်ပါတယ်။