ခွဲခွာရတော့မယ့် သားဖြစ်သူအတွက် လွမ်းစရာစာလေးရေးပေးခဲ့တဲ့ Nam Da-reum ရဲ့ မေမေ

တောင်ကိုရီးယားကလေးသရုပ်ဆောင်လေးအဖြစ် နာမည်ကြီးတဲ့ Nam Da-reum လေးကို အားလုံးပဲ သိကြမှာပါနော်။ ငယ်ငယ်ကတည်းက ချောမောပြီး သရုပ်ဆောင် ကောင်းလွန်းလှတဲ့ Nam Da-reum လေးဟာ အသက်ကြီးတော့လည်း မျက်နှာလေးက ပိုပိုပြီးချောလာပါတယ်။ လက်တလောမှာတော့ Nam Da-reum က ကလေးသရုပ်ဆောင်မှာမဟုတ်ဘဲ လူကြီးဇာတ်ရုပ်တွေမှာပါ ပါဝင်သရုပ်ဆောင်နေပြီပဲဖြစ်ပါတယ်။ Nam Da-reum ရဲ့ အသက်ကတော့ ၂၁ နှစ်အရွယ်ရှိနေပြီပဲဖြစ်ပါတယ်။ Nam Da-reum ဟာ ပြီးခဲ့တဲ့ ဇန်နဝါရီလ ၈ ရက်နေ့မှာ စစ်မှုထမ်းဆောင်ဖို့ စာရင်းပါလာခဲ့တာဖြစ်ပါတယ်။ သားဖြစ်သူနဲ့ခွဲခွာရတော့မှာ ဖြစ်တာကြောင့် Nam Da-reum ရဲ့ မေမေတစ်ယောက် သူ့သားလေးအတွက် လွမ်းစရာစာလေးတစ်စောင်ကို ရေးပြီး SNS စာမျက်နှာပေါ်မှာ ဝေမျှခဲ့ပါတယ်။

“ကျွန်မရဲ့ သားလေးကတော့ သတ္တိရှိရှိ ကျန်းကျန်းမာမာ ရဲရဲဝံ့ဝံ့နဲ့ သတ်မှတ်ထားတဲ့ အချိန်စာရင်းအတိုင်း စစ်မှုထမ်းဆောင်ခဲ့ပါတယ်။ ဒီနေ့ကစပြီး သူက နိုင်ငံ့သားကောင်းရတနာလေးဖြစ်သွားပါပြီ။ ကျေးဇူးပြုပြီး သားလေးကို ဂရုစိုက်ပေးပါနော်။ သားလေးကို အမှတ်တရရှိနေပြီပြီး ထောက်ပံ့မှုတွေပေးနေတဲ့ တစ်ဦးတစ်ယောက်စီတိုင်းကို ကျေးဇူးတင်ပါတယ်။ သားလေးကို စစ်မှုထမ်းဆောင်ဖို့ လွှတ်လိုက်ရပြီဆိုတော့ လွတ်နေတဲ့ အခန်းလေးကို ကြည့်ပြီး ညတိုင်းလွမ်းရတော့မှာ .. သားလေးရဲ့ အခန်းကို အချိန်အတိုင်းအတာ တစ်ခုအထိ ကျွန်မ သွားကြည့်နိုင်ဦးမှာမဟုတ်လောက်ဘူး။ သားလေးကို လေ့ကျင့်ရေးစင်တာကို ပို့ပေးပြီး ကျွန်မတစ်ယောက်တည်း အိမ်ကို ပြန်လာခဲ့ရတယ်။

အိမ်ရောက်တော့ မှောင်မဲနေပြီး အရမ်းကို ခြောက်ကပ်သွားတဲ့ အိမ်ကိုကြည့်ပြီး ငိုလိုက်ရတာရှင် .. တတ်နိုင်သမျှ အားကုန်သုံးပြီး ရှိသမျှ သတ္တိတွေနဲ့ သားလေးရဲ့ အိပ်ခန်းဆီကို သွားခဲ့တယ် .. သားအခန်းကိုရောက်တော့ သားလေးက အပူပေးစက်လေး ပိတ်သွားပေမယ့် Dream catcher ရဲ့ မီးကို မပိတ်သွားဘူး .. Dream catcher ရဲ့ မီးလေးကို ကြည့်ပြီး ထပ်ပြီး ငိုရပြန်ရော .. အားလုံးက ကျွန်မ အခုပြောတဲ့ အကြောင်းအရာကို ဖတ်ကြည့်ပြီး အရမ်းပိုတယ်လို့ ထင်ချင် ထင်ကြပါလိမ့်မယ် .. ဒါပေမယ့် ဖေဖော်ဝါရီလ ၈ ရက်နေ့က ကျွန်မရဲ့ အထူးခြားဆုံးညလေးပါ။ ဒီနေ့မှာပဲ ကျွန်မက ကျွန်မသားလေးကိုနိုင်ငံအတွက် ပေးလိုက်ရတာလေ .. ကျွန်မသားလေး ဆံပင်လေးကို ညှပ်ပြီး ဘဝအသစ်ကို စတင်ခဲ့တဲ့ နေ့လေးပေါ့ရှင့် .. ”

Nam Da-reum ရဲ့ မေမေ ရေးထားတဲ့ စာလေးထဲမှာ ခံစားချက်တွေအပြည့်ပါနေတာကြောင့်လည်း ပရိသတ်တွေက အားပေးစကားလေးတွေ အများကြီးရေးပေးထားကြပါတယ်။

Nam Da-reum ဟာ ကလေးသရုပ်ဆောင်လေးအဖြစ် ၂၀၀၉ ခုနှစ်ကစတင်ကာ ပွဲဦးထွက်လာခဲ့တဲ့သူဖြစ်ပြီး ကလေးသရုပ်အဖြစ် ပါဝင်ရိုက်ကူးခဲ့တဲ့ ဇာတ်လမ်းတွေက “Boys Over Flowers” ၊ (“The Partner ၊ A Man Called God ၊ The Horse Healer ၊ Ugly Alert ၊ Three Days ၊ Big Man ၊ Pinocchio ၊ Heart to Heart ၊ Six Flying Dragons ၊ The King In Love ၊ Come and Hug Me ၊ Where Stars Land ၊ A Piece of Your Mind နှင့် Start Up ဇာတ်ကားတို့ပဲဖြစ်ပါတယ်။