မထင်မှတ်ထားလောက်အောင်လူကြီးမျက်နှာနဲ့ကွဲထွက်နေတဲ့ပုံစံကြောင့် လူစိတ်ဝင်စားမှုများပြားနေတဲ့ တောင်ကိုရီးယားသရုပ်ဆောင် Lee Do-hyun

တောင်ကိုရီးယား သရုပ်ဆောင်တွေအားလုံးဟာ ချောမောလှပတဲ့မျက်နှာပုံစံလေးတွေနဲ့ တစ်ကမ္ဘာလုံးက ပရိသတ်တွေရဲ့ အသည်းနှလုံးကို ဖမ်းစားကြတဲ့သူတွေဖြစ်ပါတယ်။ သူတို့တွေထဲမှာ ကလေးဘဝတုန်းက မျက်နှာနဲ့လူကြီးမျက်နှာ တူတဲ့သူတွေရှိကြသလို ကလေးရုပ်နဲ့ လုံးဝ ကွဲထွက်သွားကြတဲ့သူတွေလည်းရှိပါတယ်။ ဒီတစ်ခေါက်မှာလည်း တောင်ကိုရီးယားနာမည်ကြီးသရုပ်ဆောင်တစ်ယောက်ရဲ့ မျက်နှာပုံစံလေးက လူစိတ်ဝင်စားမှုများပြားလျက်ရှိပါတယ်။ သူကတော့ အခြားသူမဟုတ်ပါဘူး။ တောင်ကိုရီးယားမင်းသား Lee Do-hyun ပဲဖြစ်ပါတယ်။

Lee Do-hyun ရဲ့ မူလတန်းကျောင်းက ဓာတ်ပုံလေးတွေက ဖေဖော်ဝါရီ ၃ ရက်နေ့မှာ ထွက်ပေါ်လာခဲ့တာဖြစ်ပြီး ထွက်ပေါ်လာလာချင်းမှာပဲ ပရိသတ်တွေရဲ့ အာရုံစိုက်မှုကို တခဲနက် ရရှိခဲ့တာဖြစ်ပါတယ်။ ဓာတ်ပုံလေးတွေထဲမှာဆိုရင် Lee Do-hyun က မျက်မှန်လေးနဲ့ ဝဝကစ်ကစ်လေးဖြစ်နေတာပါ။

နောက်ထပ်ဓာတ်ပုံတစ်ပုံမှာလည်း Lee Do-hyun က သူ့ရဲ့ ပါးလေးကို ကိုင်ပြီး အိုက်တင်ပေးနေတာပါ။ Lee Do-hyun ငယ်ငယ်တုန်းက ပုံစံလေးက ပါးဖောင်းဖောင်းလေးနဲ့ အရမ်းကို ချစ်ဖို့ကောင်းနေတာကြောင့်လည်း ပရိသတ်တွေက ချစ်နေကြပါတယ်။

အလယ်တန်းကျောင်းက ဓာတ်ပုံလေးထဲမှာလည်း Lee Do-hyun ရဲ့ ပိုပြီးရင့်ကျက်လာတဲ့ ပုံစံလေးကို တွေ့လာရပါတယ်။ နူးညံ့တဲ့အပြုံးနဲ့ကြည်လင်တဲ့ ပုံရိပ်လေးတွေကြောင့်လည်း Lee Do-hyun တစ်ယောက် ပရိသတ်တွေရဲ့ အာရုံစိုက်မှုကို ပိုပြီးရရှိနေပါတယ်။

တောင်ကိုရီးယားမင်းသား Lee Do-hyun ကို ၁၉၉၅ ခုနှစ်မှာ မွေးဖွားခဲ့တာဖြစ်ပြီး အခုအချိန်မှာဆိုရင် သူ့အသက်က ၂၆ နှစ်ရှိနေပြီပဲဖြစ်ပါတယ်။

Lee Do-hyun ဟာအရမ်းသရုပ်ဆောင်ကောင်းတဲ့သူဖြစ်ပြီး ဆုတွေလည်း အများကြီးရရှိထားတဲ့သူဖြစ်ပါတယ်။ သူပါဝင်သရုပ်ဆောင်ထားတဲ့ နာမည်ကြီးဇာတ်ကားတွေက “18 Again” , “Sweet Home” နဲ့ “Youth of May” တို့ဖြစ်ပါတယ်။

ဆွဲဆောင်မှုရှိပြီး ရီလဲ့လဲ့မျက်လုံးလေးတွေကြောင့်လည်း Lee Do-hyun ကို ချစ်တဲ့သူတွေပိုများကြတာဖြစ်ပါတယ်။ ခံစားချက်ပါတဲ့ အချစ်ဇာတ်လမ်းတွေရိုက်ရင် အရမ်းကျွမ်းကျင်မှုရှိတာကြောင့်  Lee Do-hyun ရဲ့ နာမည်ပြောင်ကိုလည်း ပရိသတ်တွေက ချစ်စနိုးနဲ့ “Rom-com Master” (Romance Comedy Master) လို့ ခေါ်ဝေါ်ကြပါတယ်။