ဝါ့ရင့်လူရွှင်တော်ကြီးဦးမေတ္တာကွယ်လွန်ခြင်း ၅ လပြည့်အလှူပြုလုပ်ပေးခဲ့တဲ့ မိသားစုဝင်များ

ကျရာဇာတ်ရုပ်မှာ ပီပီပြင်ပြင်သရုပ်ဆောင်နိုင်သလို ပရိသတ်တွေကို ရယ်မောပြောရွှင်အောင် လုပ်ပေးလေ့ရှိတဲ့ ဝါရင့်လူရွှင်တော်ကြီး ဦးမေတ္တာ ကွယ်လွန်သွားခဲ့တာ ယမန်နေ့ ဇန်နဝါရီလ ၂ ရက်နေ့တုန်းက ၅ လပြည့်သွားခဲ့ပြီပဲဖြစ်ပါတယ်။

ဦးမေတ္တာကွယ်လွန်ခြင်း ၅ လ ပြည့်တဲ့အနေနဲ့ ကျန်ရစ်သူမိသားစုက ယမန်နေ့ ဇန်နဝါရီ ၂ရက်နေ့တုန်းက ကိုးထပ်ကြီး ဘုရားဝင်း ၊ ရွှေတောင်တိုက်သစ် ဘုန်းတော်ကြီးကျောင်းမှာ သံဃာတော်များကို နေ့ဆွမ်းကပ်ခဲ့ကာ ဘုန်းတော်ကြီး ပညာသင်ကျောင်းမှ ကလေးများကိုလည်း နေ့လည်စာ လှူဒါန်းခဲ့တယ်လို့ သိရပါတယ်။

ဦးမေတ္တာဟာ သြဂုတ်လ ၂ ရက်နေ့  ၊ နေ့လည် ၁၂ နာရီအချိန်မှာ ကွယ်လွန်သွားခဲ့တာဖြစ်ပါတယ်။ ဦးမေတ္တာဟာ စီးပွားရေးဘွဲ့ B.Com(Eco) ရရှိထားသူ ဖြစ်ပေမယ့် လူရွှင်တော်အလုပ်ကိုဝါသနာပါတာကြောင့် တက္ကသိုလ်အနုပညာလောကမှတစ်ဆင့် လူရွှင်တော်တစ်ယောက်ဖြစ်လာခဲ့တဲ့သူဖြစ်ပါတယ်။

ဦးမေတ္တာ ကွယ်လွန်သွားချိန်မှာ အသက် ၆၇ နှစ်အရွယ်ရှိပြီဖြစ်ပြီး အနုပညာလောကအတွက် ကြီးမားတဲ့ ဆုံးရှုံးမှုကြီးတစ်ခုဖြစ်တာကြောင့် ပရိသတ်အများအပြား နှမြောဝမ်းနည်းစိတ်မကောင်း ဖြစ်ခဲ့ကြရပါတယ်။