ရုပ်ရှင်သရုပ်ဆောင် ၊ ဒါရိုက်တာလူမင်း အလုပ်ကြမ်းနှင့်ထောင်ဒဏ် ၃ နှစ်ချမှတ်ခံရ

မြန်မာနိုင်ငံရုပ်ရှင်လောကမှာ ဆရာတစ်ဆူဖြစ်တဲ့ ဦးလူမင်းကို ဒီကနေ့ အင်းစိန်ထောင်တွင်း အထူးတရားရုံးကနေ အလုပ်ကြမ်းနှင့်ထောင်ဒဏ် ၃ နှစ် ချမှတ်လိုက်တယ်လို့ သိရပါတယ်။ ဦးလူမင်းဟာ ပြည်သူတွေနဲ့တစ်သားတည်း ရပ်တည်ခဲ့တဲ့ လေးစားစရာ အနုပညာရှင်တွေထဲကတစ်ဦးဖြစ်ပြီး ဖေဖော်ဝါရီလကတည်းက အမှန်တရားဘက်က ရဲရဲဝင့်ဝင့် ပါဝင်ခဲ့တဲ့သူဖြစ်ပါတယ်။ ဦးလူမင်းကို စစ်ကောင်စီက ၂၀၂၁ ခုနှစ် မတ်လကတည်းက ဖမ်းဆီးခဲ့တာဖြစ်ပါတယ်။

ဦးလူမင်းဟာ အာဏာသိမ်းဆန့်ကျင်မှုမှာ ပါဝင်ခဲ့တာကြောင့် ရာဇသတ်ကြီးပုဒ်မ ၅၀၅ - က နဲ့ အင်းစိန်ထောင်တွင်းတရားရုံးမှာ တရားရင်ဆိုင်နေရတဲ့ သူဖြစ်ပါတယ်။

ဒီကနေ့ ဒီဇင်ဘာလ ၃၀ ရက်နေ့မှာ ရုပ်ရှင်သရုပ်ဆောင် ဒါရိုက်တာ ဦးလူမင်း အပြင် သရုပ်ဆောင်ရဲတိုက် ကိုလည်း အလုပ်ကြမ်းနှင့် ထောင်ဒဏ် ၃ နှစ်ချမှတ်ခဲ့တယ်လို့ သိရပါတယ်။ ဒါ့အပြင် ကိုမင်းသွေးသစ်ကို ထောင် ၁ နှစ် ၊ ကိုအေးအောင်ကို ထောင် ၃ နှစ် ၊ ဒေါက်တာမျိုးညွန့်ကို ထောင် ၂ နှစ်စီ အမိန့်ချမှတ်လိုက်တယ်လို့ သိရပါတယ်။ သရုပ်ဆောင် ရဲတိုက်နှင့် ဦးလူမင်းတို့ ချမှတ်ခံရတဲ့ထောင်ဒဏ်တွေဟာ  စွပ်စွဲခံရတဲ့ ပြစ်ဒဏ်တွေထဲမှာ အမြင့်ဆုံးဖြစ်တယ်လို့ သိရပါတယ်။