ခရစ်စမတ်လက်ဆောင်ရွေးချယ်ဖို့ အခက်အခဲဖြစ်နေလား .. ဒီစာလေးကိုဖတ်လိုက်ပါ

အားလုံးပဲအေးချမ်းလှတဲ့ဆောင်းရာသီ ခရစ်စမတ်ရာသီ ကိုရောက်ရှိလာပြီနော်.. ခရစ်စမတ်ရာသီမှာဆိုရင် သူငယ်ချင်းတွေကြားမှာ ၊ ချစ်ခင်ရသူ မိသားစုဝင်တွေကြားမှာ ၊ လုပ်ဖော်ကိုင်ဘက်တွေကြားမှာ အချင်းချင်း လက်ဆောင်လေးတွေ လဲလှယ်ပေးကြပါတယ်။ လက်ဆောင်လေးတွေ ပေးရတော့မယ်ဆိုရင် အရင်ဆုံး အခက်အခဲဖြစ်တာက ဘာရွေးရမှန်းမသိတာပါ။ ကိုယ်ရွေးပေးလိုက်တဲ့ပစ္စည်းက သူ့အတွက် အသုံးမဝင်မှာတို့ ၊ ရွေးချယ်စရာတွေများနေတာကြောင့် ဘာပေးလို့ပေးရမှန်းမသိတာတို့ .. စတဲ့အခက်အခဲလေးတွေဖြစ်တတ်ပါတယ်။ ဒါကြောင့် ဒီစာလေးကို ဖတ်ကြည့်ပေးပါနော်။လက်ဆောင်ရွေးချယ်ဖို့ အကြံသေးသေးပဲဖြစ်ဖြစ်သေချာပေါက်ရသွားမှာပါ။

လက်ဆောင်တွေရွေးချယ်တော့မယ်ဆိုရင် အရင်ဆုံး S  ၄ လုံးစည်းမျဉ်း (SSSS Rules) ကို အရင်တွေးရပါမယ်။ S ၄ လုံးစည်းမျဉ်းက ဘာလဲဆိုတာလေး အရင်ပြောပါမယ်နော်။

Something you want - သင်လိုချင်တဲ့ပစ္စည်း

ကိုယ်ကိုယ်တိုင် လိုချင်နေတဲ့ပစ္စည်းခပ်မိုက်မိုက်လေးကို အခြားသူကို လက်ဆောင်ပေးဖို့ ရွေးချယ် လိုက်ပြီဆိုကတည်းက အခြားသူလည်း ကြိုက်နှစ်သတ်မယ်ဆိုတာ သေချာပါတယ်။ ဒီနည်းလေးကတော့ လက်ဆောင်ပေးဖို့ တွေးရခက်နေရင် လုပ်သင့်တဲ့နည်းလေးပါ။ ကိုယ့်ရဲ့ တစ်ဖက်လူအပေါ်မှာထားတဲ့ စေတနာပေါ့နော်။ ဒီနည်းလေးက gender အတူတူလေးဆိုပိုကောင်းပါတယ်။

Something you need - သင်လိုအပ်တဲ့ပစ္စည်း

အခြားသူတစ်ယောက်ကို လက်ဆောင်ပေးတော့မယ်ဆိုရင် အရင်ဆုံးတွေးရမှာက ငါသာ ဒီပစ္စည်းကိုရရင် သုံးဖြစ်မှာလားဆိုတာကိုပါ။ ကိုယ့်အတွက် အသုံးမလိုတဲ့ပစ္စည်းက အခြားသူအတွက်ဆိုရင်လည်း အသုံးဝင်နိုင်မှာ မဟုတ်ပါဘူး။ ဒါကြောင့် လက်ဆောင်ရွေးပြီဆိုရင် သူ့ဖက်ကိုယ့်ဖက် နှစ်ဖက်တွေးပြီးရွေးချယ်ပေးရပါမယ်။

Something to wear - ဝတ်ဆင်စရာတစ်ခုခု

ဝတ်ဆင်စရာဆိုတဲ့အရာက တစ်နေ့တာမှာ လူတိုင်းအသုံးပြုနေတဲ့အရာပါ။ ဝတ်ဆင်စရာတွေထဲမှာ အဝတ်အစားတွေလည်းပါသလို၊ လက်ပတ်နာရီ လက်ကောက်စတဲ့ accessories တွေလည်းပါပါတယ်။ နောက်ဆုံးလက်ဆောင်ရွေးဖို့ အရမ်းစဉ်းစားရခက်နေရင် ကိုယ်နေ့စဉ်နေ့တိုင်း ဝတ်လေ့ဝတ်ထရှိတဲ့အရာတွေကို ခေါင်းကနေခြေအဆုံး တွေးလိုက်ပါ။ အဲဒီထဲကမှ ကိုယ်ပေးရမယ့် တစ်ဖက်လူအတွက်အလိုအပ်ဆုံးဖြစ်မယ်ထင်တဲ့အရာလေးကို စဉ်းစားလိုက်ပါ။ ဒီနည်းလမ်းလေးကလည်း သင့်ကို လက်ဆောင်ရွေးဖို့အကောင်းဆုံးအကြံဉာဏ်လေးတွေ ပေးနိုင်မယ့်နည်းလေးဖြစ်ပါတယ်။

Something to read - ဖတ်စရာတစ်ခုခု

စာအုပ်ဆိုတာကလည်း စာပေကြိုက်နှစ်သတ်သူတေအတွက် အရမ်းကို တန်ဖိုးထားရတဲ့ အရာပါ။ တန်ဖိုးအများကြီးမပေးရဘဲ အဆင့်မြင့်မြင့်လက်ဆောင်လေးကို ပေးချင်တဲ့သူတွေကတော့ စာအုပ်လေးတွေကို ရွေးချယ်လေ့ရှိကြပါတယ်။ဒါပေမယ့် တစ်ခုသတိထားရမှာရှိပါတယ်။ ကိုယ်ပေးမယ့်သူက စာဖတ်ရတာကြိုက်မကြိုက်ကိုသေချာပြန်လေ့လာကြည့်ပါနော်။ အကယ်၍ သူကစာအုပ်ဖတ်ရမှာ မကြိုက်ဘူးဆိုရင်တော့စာအုပ်အစား အခြားဟာလေးတွေ ရွေးချယ်လိုက်တာ ပိုပြီးကောင်းပါလိမ့်မယ်။

ဒီ S ၄ လုံး စည်းမျဉ်းလေးက လက်ဆောင်ပေးဖို့ရွေးချယ်တဲ့အခါမှာ ပထမဦးဆုံးတွေးကြည့်သင့်တဲ့ နည်းလမ်းလေးတွေဖြစ်ပါတယ်။ ဒီနည်းလမ်းလေးတွေအတိုင်းစဉ်းစားလိုက်ရင် တကယ်ကိုကောင်းမွန်တဲ့လက်ဆောင်ရွေးချယ်စရာ အကြံဉာဏ်လေးတွေရလာမှာပါ။ ကဲ့ .. အခုအကြောင်းအရာလေးကတော့ဒီလောက်ပါပဲနော်။ ပျော်ရွှင်စရာ ခရစ်စမတ်ကာလလေး ဖြစ်ပါစေလို့ စာဖတ်သူတွေကိုဆုတောင်းပေးလိုက်ပါတယ်။