သူတို့အဖွဲ့ရဲ့ Red Velvet အယ်ဘမ်တွေကို မဝယ်ဖို့ပြောလိုက်တဲ့ Wendy

မကြာသေးမီက ထွက်ရှိလာခဲ့တဲ့ Red Velvet အဖွဲ့ဝင် Wendy ရဲ့ သတင်းဟာ ပရိသတ်တွေကြားမှာ ရှာဖွေမှုအများဆုံးဖြစ်နေပါတယ်။ ရှာဖွေမှုအများဆုံးဖြစ်နေတဲ့ အကြောင်းအရာကတော့ Red Velvet အဖွဲ့ဝင် Wendy ကသူမတို့အဖွဲ့အယ်ဘမ်တွေကို ပရိသတ်တွေကို မဝယ်ဖို့ တောင်းဆိုခဲ့တဲ့စာရေးတင်ခဲ့တဲ့ အကြောင်းပဲဖြစ်ပါတယ်။ 

တားမြစ်ခဲ့ရတဲ့အကြောင်းအရင်းက Wendy က သူမရဲ့ပရိသတ်တွေပြောတဲ့ စကားကိုသိခဲ့ပြီး အဆိုပါ စကားဝိုင်းထဲမှာ Red Velvet ရဲ့ အယ်ဘမ်ကို ဝယ်ယူဖို့အတွက် ပိုက်ဆံတွေစုရမယ်လို့ ပြောနေကြတာကို တွေ့ရှိခဲ့တာကြောင့် ဖြစ်တယ်လို့ဆိုပါတယ်။ Wendy က concert အကြောင်းဘာမှမသိရသေးပေမယ့် အယ်ဘမ်တွေကိုအများကြီး မဝယ်ဖို့ ၊ အယ်ဘမ်တစ်ခုထဲဝယ်ရုံနဲ့ လုံလောက်နေပြီဖြစ်ကြောင်း သူမတို့အဖွဲ့ရဲ့ သီချင်းလေးတွေကိုနားထောင်ပေးရုံနဲ့တင် ထောက်ပံ့ပေးပြီးသားဖြစ်ကြောင်း လုံလောက်နေပြီဖြစ်ကြောင်း ဆိုခဲ့ပါတယ်။ 

Wendy က အယ်ဘမ်ဝယ်မယ့် ပိုက်ဆံတွေနဲ့ အရသာရှိတဲ့ အစားအသောက်တွေကိုဝယ်ပြီး မိသားစုနဲ့အတူ စားလို့ရသလို ၊ ကျန်းမာရေးအတွက်လည်း အသုံးပြုလို့ရကြောင်း ဆိုပါတယ်။ Wendy က ပိုက်ဆံလေးတွေကိုသိမ်းထားပြီး စားကောင်းတာဝယ်စားဖို့ ၊ အနွေးထုတ်လေးတွေဝယ်ပြီး နွေးနွေးထွေးထွေးနေဖို့ ၊ နေမကောင်းရင်ဆေးရုံသွားဖို့ တိုက်တွန်းထားပါတယ်။ အခုရက်ပိုင်းတွေမှာ ပရိသတ်တွေက အယ်ဘမ်ဝယ်ဖို့ပဲ စိတ်ထဲရှိနေတာကြောင့် အယ်ဘမ်ဝယ်ဖို့ချည်းမလုပ်ဘဲ အရေးကြီးတာလေးတွေ လုပ်ဖို့အတွက်လည်း ဆက်လက်တိုက်တွန်းထားပါတယ်။ 

ဒါ့အပြင် Wendy က အယ်ဘမ်တွေက ဗားရှင်အမျိုးမျိုးထွက်နေတာကြောင့် ဗားရှင်းမျိုးစုံဝယ်ဖို့လည်း မလိုအပ်ဘဲ အရမ်းကြိုက်တဲ့ တစ်ခုကို ဝယ်ယူရုံနဲ့လုံလောက်ကြောင်း ထပ်ဆောင်းပြောထားပါသေးတယ်။ 

Wendy ရဲ့တောင်းဆိုမှုကို Netizen တွေက ထောက်ခံခဲ့ကြပြီး သူမရဲ့ ပရိသတ်အပေါ် တောင်းဆိုချက်ကို ချီးကျူးထားပါတယ်။ Wendy ရဲ့ နာမည်အရင်းက Son Seung-wan ဖြစ်ပြီး သူမက ၂၀၁၄ ခုနှစ်ကတည်းက Red Velvet အဖွဲ့ဝင်တစ်ယောက်အဖြစ် ပွဲဦးထွက်ခဲ့တာဖြစ်ပါတယ်။