အောင်မြင်မှုတွေ တဟုန်ထိုးရခဲ့ပြီးမှ ဖြေမဆည်နိုင်အောင် နာမည်ကျဆင်းခဲ့တဲ့ မင်းသမီး

တောင်ကိုရီးယားမင်းသမီး Yoon Eun-hye ဟာဆိုရင် ရွှေမင်းသားလေး ချစ်ပုံပြင် ဇာတ်လမ်းတွဲနဲ့ ပရိသတ်တွေရဲ့အားပေးမှုကို တခဲနက်ရရှိခဲ့တဲ့သူဖြစ်ပါတယ်။ Yoon Eun-hye ကို ၁၉၈၄ ခုနှစ်မှာ မွေးဖွားခဲ့တာကြောင့် သူမအသက်က ၃၇ နှစ်ရှိနေပြီပဲဖြစ်ပါတယ်။ Yoon Eun-hye က သရုပ်ဆောင် ၊ အဆိုတော် တစ်ယောက်ဖြစ်ရုံသာမကမော်ဒယ်တစ်ယောက်အနေနဲ့လည်း အောင်မြင်မှုတွေ ရရှိပိုင်ဆိုင်ခဲ့တဲ့ သူဖြစ်ပါတယ်။ Yoon Eun-hye ပါဝင်သရုပ်ဆောင်ထားတဲ့ နာမည်ကြီး ဇာတ်လမ်းတွေက Princess Hours (2006) ၊ The Vineyard Man (2006) ၊Coffee Prince (2007) ၊ My Fair Lady (2009) ၊ Lie to Me (2011) နဲ့ Missing You (2012) ဇာတ်လမ်းတွဲတွေပဲဖြစ်ပါတယ်။

Yoon Eun-hye က သရုပ်ဆောင်ပိုင်းမှာ တစ်ဖက်ကမ်းခပ် တော်လွန်းရုံသာမက Baby Vox အဖွဲ့မှာလည်း ၁၉၉၉ ခုနှစ်ကနေ ၂၀၀၅ ခုနှစ်အထိ ပါဝင်ခဲ့ပါသေးတယ်။ ဒါကြောင့် Yoon Eun-hye  က အခု နောက်ပိုင်းမှာ နာမည်ကြီးပြီးအောင်မြင်မှုတွေရရှိနေတဲ့ မိန်းကလေးအိုင်လ်ဒေါ အဆိုတော်အဖွဲ့တွေရဲ့ စီနီယာတစ်ယောက်ဆိုရင်လည်း မမှားပါဘူး။ Yoon Eun-hye က အိုင်လ်ဒေါတစ်ယောက်ဖြစ်ခဲ့တယ်ဆိုပေမယ့်လည်း Anti-fan ပိုများခဲ့တဲ့ သူဖြစ်ပါတယ်။Anti- fan တစ်ယောက်က  Yoon Eun-hye မျက်လုံး ကန်းသွားစေဖို့အတွက်ရည်ရွယ်ပြီး ငရုတ်ရည်တွေနဲ့ မျက်လုံးကို ပက်ခဲ့တယ်လို့ သိရပါတယ်။ 

Yoon Eun-hye က အိုင်လ်ဒေါလောကကနေ အနားယူပြီး သရုပ်ဆောင်လောကထဲကို ဝင်ခဲ့ပြီးနောက်မှာ ရွှေမင်းသားလေး ချစ်ပုံပြင် ဇာတ်လမ်းနဲ့ အောင်မြင်မှုတွေ ရရှိပိုင်ဆိုင်ခဲ့ပါတယ်။ ရွှေမင်းသားလေး ချစ်ပုံပြင်ဇာတ်လမ်းတွဲ အပြီးမှာလည်း ရိုက်သမျှဇာတ် ကားတိုင်း တဟုန်ထိုး လူကြည့်များ အောင်မြင်ခဲ့ပါတယ်။ 

၂၀၀၉ ခုနှစ်မှာ Yoon Eun-hye က KBS ရဲ့ ဒရမ်မာတစ်ခုဖြစ်တဲ့ My Fair Lady ဇာတ်လမ်းတွဲမှာ ပါဝင်သရုပ်ဆောင်ခဲ့ပါတယ်။ ဒါပေမယ့်လည်း အခြားဇာတ်လမ်းတွဲတွေနဲ့ မတူဘဲ Yoon Eun-hye ရဲ့ သရုပ်ဆောင်ချက်တွေက ဝေဖန်မှုတွေ မြင့်တက်ခဲ့ပါတယ်။ ပရိသတ်တွေက Yoon ကို  လုပ်ပြီးတမင် အာရုံစိုက်ခံရအောင်သရုပ်ဆောင်နေတယ်ဆိုပြီး ဝေဖန်ခဲ့ကြတာဖြစ်ပါတယ်။  Yoon Eun-hye ဟာ ဖက်ရှင်ဒီဇိုင်းတွေနဲ့ ပတ်သက်ပြီးတော့လည်း သူမဝင်ရောက်ယှဉ်ပြိုင်ခဲ့တဲ့ တရုတ် ဖက်ရှင် အစီအစဉ်ဖြစ်တဲ့ Goddess Fashion မှာ ဆုရရှိခဲ့ပါတယ်။ ဆုရရှိခဲ့ပြီးနောက်မှာ Yoon Eun-hye ရဲ့ ဖက်ရှင်ဒီဇိုင်းတွေက ကိုရီးယားဖက်ရှင် ဒီဇိုင်နာ Yoon Choon Ho ရဲ့ ဒီဇိုင်းတွေကို ခိုးယူထားတယ်ဆိုပြီး ဝေဖန်ခြင်းတွေ ခံခဲ့ရပြန်ပါတယ်။ ဒါပေမယ့်လည်း Yoon Eun-hye ကအပြစ်ကို ဝန်မခံခဲ့ဘဲ ငြင်းဆန်ဖို့ ကြိုးစားခဲ့ပါတယ်။ 

Yoon Eun-hye က တစ်ခေတ်တစ်ခါက အောင်မြင်မှုတွေ အများကြီး ရရှိခဲ့တယ်ဆိုပေမယ့်လည်း တစ်စတစ်စပေါ်ပေါက်လာတဲ့ နာမည်ပျက်တွေကြောင့် တဖြည်းဖြည်း နာမည်ကျဆင်းခဲ့ရပါတယ်။ 

အခုနောက်ပိုင်းမှာ Yoon Eun-hye ပါဝင်သရုပ်ဆောင်ထားတဲ့ ဇာတ်ကားတွေကို တွေ့တောင်မတွေ့ရတော့ပါဘူး။ သူမ ပါဝင်သရုပ်ဆောင်ထားတဲ့ နောက်ဆုံး ဇာတ်လမ်းတွဲကတော့ ၂၀၁၉ ခုနှစ်က ထွက်ရှိခဲ့တဲ့ Go Go Song  ဇာတ်လမ်းပဲဖြစ်ပါတယ်။လက်ရှိမှာဆိုရင် Yoon Eun-hye က သူမရဲ့ နာမည်ကို ပြန်ပြီးဆယ်နိုင်ဖို့အတွက် အတက်နိုင်ဆုံး ကြိုးစားခဲ့လျက်ရှိပါတယ်။ Yoon Eun-hye က လက်ရှိမှာ တွဲနေတဲ့သူ မရှိသေးသလို အိမ်ထောင်ပြုထားခြင်းလည်း မရှိသေးပါဘူး။

တစ်ခေတ်တစ်ခါက လျှမ်းလျှမ်းတောက် အောင်မြင်ခဲ့ပြီးမှ နာမည်ကျဆင်းခဲ့ရတဲ့ တောင်ကိုရီးယားမင်းသမီးYoon Eun-hye ရဲ့ အကြောင်းကို ပရိသတ်ကြီးအတွက်ဝေမျှပေးလိုက်ပါတယ်။