လူတိုင်းမလုပ်နိုင်တဲ့ ကောင်းမှုကုသိုလ်လေးတစ်ခုကို လုပ်ဆောင်ခဲ့တဲ့ BTS အဖွဲ့ဝင် J-Hope

BTS အဖွဲ့ဝင်တွေ ဟာဆိုရင် စိတ်ရင်းစေတနာကောင်းပြီး အောင်မြင်မှု ရရှိနေတဲ့ သူတွေအဖြစ် သတ်မှတ်ခြင်းခံထားရတဲ့ သူတွေ ဖြစ်ပါတယ်။ BTS အဖွဲ့ဝင် J-Hope ဟာဆိုရင်လည်း မကြာသေးမီက လူတိုင်းမလုပ်နိုင်တဲ့ ကိစ္စလေးတစ်ခုနဲ့ ပရိသတ်တွေရဲ့ အသည်းနှလုံးကို ခြွေယူနိုင်ခဲ့ပါတယ်။ သြဂုတ်လ ၁၀ ရက်နေ့တုန်းက J-Hope က MBC ရဲ့ Standard FM ကနေပြီး Kim Ea-na’s Star Night အစီအစဉ်မှာ ဧည့်သည်အဖြစ်ပါဝင် ခဲ့ပါတယ်။

တိုက်ရိုက်ထုတ်လွှင့်မှု အစီအစဉ်မှာ J-Hope က Kim Ea-na  နဲ့အတူ ဂီတ အကြောင်းအရာများစွာကို ပြောခဲ့ပါတယ်။ အဲဒီအစီအစဉ်မှာပဲ ရေဒီယိုနားထောင်သူတစ်ဦးက ပြီးခဲ့တဲ့နှစ်တုန်းက J-Hope က လမ်းဘေးကြောင်လေးတစ်ကောင်ကို ကယ်တင်ခဲ့ကြောင်း ကယ်ပြီးတော့ ဆေးရုံကို ပို့ဆောင်ခဲ့ကြောင်း ပြောခဲ့ပါတယ်။

J-Hope က အဆိုပါ ရေဒီယို အသုံးပြုသူဆီကနေ မထင်မှတ်ထားတဲ့ အကြောင်းအရာကို ကြားကြားချင်းမှာ အလွန်အမင်း အံ့အားသင့်ခဲ့ပြီး ဘယ်လိုသိတာလဲဆိုပြီး မေးခဲ့ပါတယ်။

အဲဒီနောက်မှာ J-Hope က ကြောင်လေးကို ကယ်တင်ခဲ့တာ မှန်ကန်ကြောင်း ၊ ကြောင်လေးကို ဇာတ်လမ်းရိုက်ကူးနေရင်းနဲ့ တွေ့ရှိခဲ့တာဖြစ်ကြောင်း ၊ ကြောင်လေးကို တွေ့တဲ့အချိန်မှာ နှလုံးသားတွေ ကွဲကြေတော့မလို ခံစားခဲ့ရကြောင်း ၊ သူ့ဆီမှာလည်း မျက်စိ အမြင်အာရုံ အားနည်းတဲ့ ခွေးလေး ရှိကြောင်း ၊ အခု လမ်းဘေးကြောင်လေးရဲ့ မျက်လုံး အမြင်တွေကလည်း မကောင်းကြောင်း ၊ အရမ်းပိန်ပြီး သေးကြောင်း ၊ ဒါကြောင့် ကြောင်လေးကို ဆေးခန်းကို ပို့ပေးခဲ့ကြောင်း၊ ဆေးခန်းကို ပို့ပြီးပြီးချင်းမှာ ခြင်းတောင်းလေးနဲ့ သေချာထည့်ပေးခဲ့ကြောင်း အသေးစိတ် ပြောဆိုခဲ့ပါတယ်။ နှလုံးသားနွေးထွေးတဲ့ J-Hope က ကြောင်လေးကို သေချာလေး မွေးပေးမယ့် ပိုင်ရှင်အသစ်ကိုပါ ရှာဖွေခဲ့သေးတယ်လို့ ပြောခဲ့ပါသေးတယ်။

အဆိုပါ အကြောင်းအရာကို သိသိချင်းမှာ ရေဒီယိုနားထောင်သူတွေက J-Hope ရဲ့ နွေးထွေးတဲ့ နှလုံးသားကို ချီးကျူးခဲ့ကြပါတယ်။ J-Hope က အဆိုပါအကြောင်းအရာကို အရင်တုန်းက တစ်ခါမှ မပြောခဲ့ဖူးဘဲ အခုမှ ဖွင့်ဟ ပြောဆိုခဲ့တာဖြစ်ပါတယ်။ နွေးထွေးကြင်နာလွန်းတဲ့ J-Hope ရဲ့ ဖြစ်ရပ်ကို ပရိသတ်တစ်ဦးက သိရှိခဲ့ပြီးမှ ရေဒီယို အစီအစဉ်မှာ ဖွင့်ဟပြောဆိုခဲ့တာဖြစ်ပါတယ်။ ပရိသတ်တွေ သဲသဲလှုပ်အားပေးရတဲ့ J-Hope ရဲ့ မွန်မြတ်တဲ့ အကူအညီလေး အကြောင်းကို ပရိသတ်ကြီးအတွက် ဝေမျှပေးလိုက်ပါတယ်။