လူတွေမသိသေးတဲ့ တောင်ကိုရီးယားမင်းသမီး Park Eun-bin ရဲ့ စိတ်ဝင်စားဖွယ် အကြောင်း

တောင်ကိုရီးယားမင်းသမီး Park Eun-bin ဟာ ချစ်ဖို့ကောင်းလှတဲ့ မျက်နှာလေးနဲ့ ကျရာဇာတ်ရုပ်ကို ပီပီပြင်ပြင်သရုပ်ဆောင်နိုင်တဲ့ အရည်အချင်း ရှိသူလေးဖြစ်တာ ကြောင့် ပရိသတ်တွေရဲ့ အားပေးမှုကို တခဲနက် ရရှိထားတဲ့သူဖြစ်ပါတယ်။

လက်ရှိပြသလျက်ရှိတဲ့ Extraordinary Attorney Woo ဇာတ်လမ်းထဲမှာလည်း စိတ်ရောဂါသည် အော်တစ်ဇင်မလေးနေရာကို ကောင်းမွန်ပီပြင်စွာ သရုပ်ဆောင်နိုင်တာကြောင့် Park Eun-bin ကို ချီးကျူးနေတဲ့သူတွေ အများကြီးပဲ ဖြစ်ပါတယ်။ 

Park Eun-bin ဟာဆိုရင် အသက် ၂၇ နှစ်ရှိနေပြီဖြစ်ပြီး အသက် ၆ နှစ်အရွယ်မှာ ကတည်းက အနုပညာလမ်းကြောင်းထက်ဆီကိုရောက်ရှိနေခဲ့တာ ဖြစ်ပါတယ်။ 

Park Eun-bin ဟာ ကလေးသရုပ်ဆောင်အဖြစ်နဲ့ ၁၉၉၆ ခုနှစ်တုန်းက ကတည်းက White Nights 3.98 ဆိုတဲ့ဇာတ်လမ်းတွဲမှာ ပါဝင်ခဲ့ဖူးတဲ့သူဖြစ်ပါတယ်။ ငယ်လွန်းပြီး မျက်နှာက လူကြီးရုပ်နဲ့ ကွဲထွက်နေတာကြောင့် အဆိုပါကလေးသရုပ်ဆောင်လေးကို Park Eun-bin မှန်း မသိခဲ့ကြပါဘူး။ 

White Nights 3.98 ဇာတ်လမ်းတွဲ အပြီးမှာလည်း Empress Myeongseong (2001) ဇာတ်လမ်းတွဲ နဲ့  The Great Queen Seondeok (2009) ဇာတ်လမ်းတွဲတို့မှာ ကလေးသရုပ်ဆောင် အဖြစ် ပါဝင်ခဲ့ပါသေးတယ်။ 

အသက် ၆ နှစ်အရွယ်မှာကတည်းက အနုပညာလှုပ်ရှားမှုတွေ စတင်လုပ်ဆောင်ခဲ့ရတဲ့ Park Eun-bin ဟာ အားလပ်ချိန် မရှိလောက်အောင်ကို ပင်ပန်းခဲ့တာကြောင့် အနုပညာရှင်တစ်ယောက်ဖြစ်ရတာ ခက်ခဲခဲ့တယ်လို့ အင်တာဗျူးတစ်ခုမှာပြောခဲ့ဖူးပါတယ်။ 

“ကျောင်းနဲ့အလုပ် တစ်ချိန်တည်းမှာလုပ်ခဲ့ရတော့ ပင်ပန်းရတယ် နားချိန်မရှိဘူး .. ပျော်ရွှင်ဖို့အတွက် စည်းကမ်းတွေလည်း တစ်ခါမှ မဖောက်ခဲ့ဖူးဘူး.. အဲဒီအချိန်တွေတုန်းက ကျွန်မ တော်တော်လေး ပင်ပန်းခဲ့ရပါတယ်” 

အနုပညာလောကထဲကို စတင်ဝင်ရောက်ဖြစ်ခဲ့တာနဲ့ ပတ်သတ်တဲ့ မေးခွန်းတွေကိုလည်း Park Eun-bin က အခုလိုလေး ဖြေပေးခဲ့ပါတယ်။ 

“အနုပညာလောကထဲကို  ဝင်ခဲ့တာ မိဘတွေ ကြောင့် မဟုတ်ပါဘူး။ ကျွန်မကိုယ်တိုင်ကြောင့်ပါ .. ကိုယ် ရွေးချယ်ခဲ့တဲ့ လမ်းဖြစ်တာကြောင့် အောင်မြင်မှု ရရှိဖို့ အကောင်းဆုံး ကြိုးစားခဲ့ရပါတယ်။”

Park Eun-bin ဟာ တစ်ကားဆို တစ်ကားအောင်မြင်မှု ရရှိခဲ့တဲ့ မင်းသမီးလေး ဖြစ်ပြီး ငယ်စဉ်ကတည်းကအနုပညာ အလုပ်တွေ လုပ်ရတာ ကြိုက်နှစ်သတ်တဲ့ သူလေးဖြစ်ပါတယ်။ လူတွေမသိသေးတဲ့ တောင်ကိုရီးယားမင်းသမီးလေး Park Eun-bin ရဲ့ အကြောင်းကို ပရိသတ်ကြီးအတွက် ဝေမျှပေးလိုက်ပါတယ်။